現代人與滑鼠的關係已經難捨難離，一鼠在手，世界我有，但可能不知不覺間引致肩頸酸痛。

       滑鼠技術嘅進步，令到我哋只需要小小動作， 就可以完成我哋所想嘅工作。但係身體要操作咁細緻同準確嘅動作，其他部份經常會不為意地去固定同配合，引致局部反覆動作，對整體筋膜造成拉扯。加上通常身體好容易會向滑鼠手傾斜，造成肩頸肌肉緊張。久而久之唔能夠自己恢復，引起關節或肌肉小錯位，引發持續疼痛。尤其當大家壓力大越做越緊張嘅時候，頭頸會自然向前傾膊頭會向上縮起，令到問題更加容易發生。

        講咗咁耐，大家都明白肩頸痛可以來自細小手部肌肉，之但係我哋根本無可能完全唔用滑鼠。想減少問題嘅話，唯有多加留意自己有沒有沉肩墮肘，（好似聚精會神打機就過關嘅時候咁😆）用肩臂去帶動手腕部活動。如果想預防肩頸酸痛，隔一段時間就要站起來活動一下，輕輕拍打手臂或者按揉外關穴（前臂外側腕橫紋上兩寸）、肩井（左手搭右肩或右手搭左肩一帶都可），穴位按摩或拍打可以鬆開緊張嘅肌肉，減輕勞損。

        肩頸酸痛的確令人非常困擾，會行唔安，瞓唔着，但要根治亦唔係冇辦法喎。其實只要用獨特而輕柔嘅結構治療手法，順理肩頸肌肉以及上下手臂的關節，確定邊個部位嘅肌肉拉扯整個肩頸帶而令身體不能自行回復，從源頭解決問題。這種輕柔嘅骨傷手法可以引導大範圍嘅關節及肌肉復位，真正針對根源治療，解決痛楚。

        如果你已經出現長時間嘅疼痛，就最好係搵中醫師處理一下，有時候肩頸酸痛可以係嚴重頸椎問題嘅一個小小警告！